Cronica
La societad da musica Vignogn ei vegnida fundada il zercladur 1920 sin l’iniziativa dalla cumpignia da mats. Sur Christoffel Willi da Domat, plevon a Vignogn, ei da gliez temps sedeclaraus promts d’instruir ils giuvens e da surprender la bitgetta. Ils emprems instruments, 10 tocs, han ins cumprau dalla societad da musica Mustér per 350 francs.
Nossa societad fa dapi igl onn 1926 part dall’uniun cantunala da musica.
Igl onn 1932 ha la societad cumprau per l’emprema gada instruments novs. Quels 19 instruments ein vegni cumprai tier la fatschenta Hug ed han surviu 35 onns alla musica.
A caschun dalla messa nuviala da sur Robert Derungs ils 11 da fenadur 1948 ha la societad da musica astgau schar benedir la bandiera nova. Da quei temps obteneva la musica aunc negina uniforma.
1951 ha l’uniun cantunala da musica fatg amogna 35 uniformas dalla musica da Balsthal (SO). Quella uniformaziun ha la musica purtau entochen il 40avel anniversari. Quei anniversari ha giu liug ils 22 da matg 1960 e sco schenghetg ha la societad da musica Oensingen (Solothurn) schenghegiau ina nova uniforma.
Da calonda mars 1967 ha la societad da musica Vignogn entschiet cun ina nova instrumentaziun dalla marca Besson.
Igl onn 1969 ha nossa societad giu l’honur d’astgar organisar la 10avla fiasta da musica Sursilvana ils 11 da matg. Damai ch’ei tuccava igl onn 1970 da festivar il giubileum da 50 onns dalla fundaziun dalla musica han ins anticipau quella festivitad per in onn e menau atras ella ensemen cun la fiasta da musica.
La primavera 1972 ei la musica sepresentada a caschun dil concert primavaun cun novas monduras.
Ils 8 da matg 1983 ha nossa societad astgau festivar la benedicziun dalla nova bandiera cun il padrin Mechel Ventira e la madretscha Tresa Casanova.
Sco tier autras caussas van era ils instruments e las uniformas en decadenza aschia che la societad ei sedecidida da cumprar novs instruments e novas uniformas igl onn 1988. Cun luschezia e plascher ha la musica da Vignogn astgau beneventar ils 26 tochen ils 28 d'uost 1988 in fetg grond pievel che ha gidau e festivau ensemen cun nus quella gronda ovaziun. Quella gronda cumpra en la valeta da varga 100'000 francs havess la societad mai saviu far senza il grond sustegn da nossas preziadas donaturas e nos preziai donaturs.
Ils 23 tochen ils 25 da zercladur 1995 ha nossa societad festivau siu 75avel onn d’existenza. Sco musica hospitonta ei Küssnacht am Rigi stada dalla partida.
Mintg’onn organisescha nossa societad igl usitau concert annual. Plinavon era cuorts concerts sin plaz cadruvi sco da fiastas da baselgia ed autras occasiuns. Entginas gadas ha la societad da musica era priu part a tschentadas da cumin, dau concerts ordeifer la vischnaunca da Vignogn e la Lumnezia. Buca mo nossa societad ei stada ordeifer a concertar ni a far fiastas, era nus havein giu visetas d’autras societads da musica. 1993 ha l’enconuschenta Brass Band Berner Oberland concertau a Vignogn. Denton han el decuors dils onns era autras musicas sunau a Vignogn, sco per exempel la Brass Band Sursilvana, Schlossberg, il Cerchel musical Surselva ed autras.